Hvað er samfélagsábyrgð fyrirtækja?

Samfélagsábyrgð fyrirtækja (SÁF) felur í sér viðleitni fyrirtækja til þess að axla ábyrgð á framgangi góðs siðferðis í viðskiptum og efnahagslegri framþróun. Það gera þau með því að taka þátt í uppbyggingu samfélagsins og tryggja virðingu fyrir umhverfinu í gegnum sinn daglega rekstur.

Á síðustu árum hafa þúsundir fyrirtækja víða um heim tekið í síauknum mæli tillit til SÁF í stefnumörkun sinni og skipulagi. Alþjóðastofnanir á borð við Sameinuðu þjóðirnir og OECD, hafa með virkum hætti hvatt fyrirtæki til þess og þá hafa stjórnvöld í mörgum löndum, jafnt í Evrópu sem og annars staðar, stuðlað að því að fyrirtæki axli samfélagsábyrgð sína.

SÁF skiptir máli gagnvart neytendum, fjárfestum og starfsfólki. Hér á landi hafa fá fyrirtæki innleitt SÁF í rekstur sinn með skipulegum hætti en nú þegar mikið uppbygginarstarf er framundan í íslensku atvinnulífi er mikilvægt að eigendur og stjórnendur fyrirtækja leiti allra leiða til þess að auka samkeppnishæfni og trúverðugleika fyrirtækja sinna.

Óhætt er að fullyrða að SÁF muni skipta miklu máli í viðskiptaumhverfi framtíðarinnar og verði einn þeirra lykilþátta sem litið verði til þegar verðgildi og framtíðarhorfur fyrirtækja verða metnar.